小編最近入西貢和陽光玩遊戲，累極之時路過一間特色熱狗店「九吋半」，店舖雖小，但菜單設計誠意十足，最重要是足料又好食，實物比參考圖片更有過之而無不及，驚為天人！想知有幾正，即睇食評！
「九吋半」開業兩年，平時在西貢來去匆匆，完全沒有留意到這間位於福民路的隱世小店。多款特色熱狗餡料份量十足，材料新鮮，配搭得宜。
特別推介招牌原隻軟殼蟹熱狗，店主先以啤酒炸漿油炸軟殼蟹，然後整隻放在熱狗上，配合酸甜沙律醬，中和油膩感，味道清爽開胃。軟殼蟹熱狗一客$128，更多送一隻軟殼蟹，可以和朋友齊齊share！
另外一款海鮮熱狗一客$98，還配有蝦、煙三文魚，以及大大粒外香內軟的日本帶子，簡直是海鮮迷的至愛！
Menu上還有黑松露雜菌熱狗、三重芝士熱狗、辣肉醬熱狗等，而最普通的經典熱狗雖然只賣$28，但也一點都不馬虎，香腸比麵包還要長，加$5可配酸瓜，令口感層次更豐富，絕對抵食！
小編光顧當日天氣酷熱，連店家也忍不住開返隻西瓜仔慢慢歎。西瓜仔原隻上，無額外添加糖漿，直接把西瓜肉挖出後攪碎，不但吃到粒粒西瓜肉，而且味道香甜透心涼，只售$38，消暑一流！
下次在西貢醫肚又多一個好選擇了！
「九吋半」
地址：西貢福民路58-72號高富樓地下37號舖
營業時間：11:00 – 19:30
Photo credit: Nine Point Five
Comments